فەرهەنگ و هونەر

09:44 - 21/11/2019

تایبەتیێ ئەدەی جە سەیدی هەورامی

تایبەتیێ ئەدەی جە سەیدی هەورامی.

وڵی دێڕی و
هامدەنگی چنی مۆسیقاو سروشتی

تەشکەو شێعرەو کلاسیکەو عەرەبی و فارسی جە ویەردەنە، شێعرێ پۆرەوردای و مەدحیە و مەنقەبە و مەلحەمێ بیێنێ. ئادیچ پەی یاونای ڕادەو ملکەچی و ستایشکاری، وەرانوەروو ئەمیرێ یام سۆڵتانێ. ئی بابەتێچە پەنەوازشا بە هۆنایەو قەسیدەی بیەن. قەسیدێچ پێچەوانەو غەزەڵێ بەیتەکێش فرێ بیێنێ. ئا بابەتێچە نیازشا بە درێژی لنگێ و درێژی پایە عەرووزییەکا بیەن کە  چی ڕاستانە شمارەو بەیتەکایچ سەرەوە بیەن.

پیجۆرە یاونۆ کە زوانشا خزمەتوو دەسەڵاتچیانە بیەن نە جە خزمەتوو خەڵکیەنە و باروو سروشتوو زوانەکەینە.

زوانوو خەڵکی زوانێوە کۆڵ و سادە بیەن.

جە شێعرەی هورامیەنە ئی دیاردە بە هۆکاروو نەبیەی دەسەڵاتێوە سەقام گێرتەی،  شێعرەی ستایشیەش هەر نەبیێنە. جە ویەروو شێعرەو هۆرامانی جگەم بۆنەکا من دەقێ ستایشیێ بە مانا بابەتیەکەش کە بیە بۆ نۆرمێ ئەدەبی شکە مەبەروو یان دەگمەنا.
زوان، زوانی خەڵکی و سروشتی بیەن و زوانوو شاعێرایچ نزیک بیەن پی زوانیە، پۆکای جە شێعرەکانە، درێژی دێڕێ کەمتەر پێویا، ئەگەریچ با سەروو کاریگەری عەرووزنای عەرەبی بیەن، نەک شێعرەی بڕگەیی.

پەی نموونەی شێعرە بڕگەییەکا سەیدی بەرامایێنێ چی رێسا ئەدەبیە. مۆسیقاو ئی جۆرە شێعرا، تێکەڵێوەن جە چرکە ساتەکا(خەیاڵ) و هامدەنگی چنی دیاردەکا دەور و وەری و سروشتوو هورامانی و ژیوای ساکار و پەڕ جە تەقالا و جم و جووڵوو خەڵکەکەی، هەر پی بۆنەوە جەوهەروو مۆسیقاو شێعرە بڕگەییەکاش زادەو ئی بۆ و بەرامەیەنێ.

سەیدی ئی ڕەوشەش جە شێعرە هێجاییەکاشەنە، جە شێوازوو بێسارانیەوە، هۆرگێرتەن ئادیچ وەڵتەر سونەتێوە بیەن بەراماو شێعرەو هورمزگانی و... دماتەر ئینە بەلووتکە یاوان و چریکەو شێعرەو مەولەوی و دما مەولەویش چنە کەوەتەنوە و...

چامە بڕگەییەکا سەیدی، (بەیت) جە (5+5) تەشکەشا گێرتێنە و دلێڕاسینوو/میانگین، بەیتەکاش جە چامەینە، 8 تا 14 بەیتێنێ- ئەڵبەت تاکو توکش چەنە بەرکەردێ-
تەنیا (چامێوە) چی رێسایە ترازیان و زەقەیچەنە دلێ ئا شێعرانە. ئادیچ  چامەو پاییزییەو (چراخی سەروەخت) کە 59 بەیتێنە. وەشڵەی سەیدی ئی قەسیدێشە هەر نەواتێبیای.

ئی چامە درێژێ، هونەروو لاسایی کەردەیش پۆوە دیارا. بەڵام سەرەڕاو ئینەی بەڵگێوەن پەی ئی واتەو منە کە سەیدیێوە گەرەکش بۆ جە نۆرمەکا زوانەکەو وێش لا بدۆ بۆ بە سەیدیێوەتەر و واتەی کۆن و تازەیش دریۆ پاڵ

09:52 - 21/11/2019 تازە کریانۆ

پەیلوایو تۆ؟
Loading...
پەیلوای

هیچ پەیلوایە نەنریانەرە.