ڕاپۆرت

11:52 - 12/3/2020

بنتاگۆن: گرد ئەگەرێ وەردەممانە کریاوەن پەی وێ پارێزنای جەهەڕەشەکاو ئێرانی

بنتاگۆن: گرد ئەگەرێ وەردەممانە کریاوەن پەی وێ پارێزنای جەهەڕەشەکاو ئێرانی


هەورامی
دماو هێرشەکەو سەرو بنکەو سەروازی تاجی جە سەراوننو بەغاینە، هەریەرە سەرۆکایەتییەکێ عێراقی داواو پەیجوری بەپەلەی کەرا، پێنتاگۆنیچ ماچۆ" گرد ورچنیوە وەردەممانە کریاوەن پەی مامەڵەکەردەی چەنی هەڕەشەکاو ئێرانی دلێ عێراقینە.

شەوەی ویەردێ بە ١٠ کاتیۆشێ هێرش کریا سەرو بنکەو تاجی سەروازی ئەمریکای جە سەراوننو بەغاینە و بەهۆ ئانەیۆ دووێ سەروازێ ئەمریکیێ و سەروازێوە بەریتانی کە وچیۆ ئەفسەرێوە پلە باڵان دلێ هێزەکاو ناتۆینە کوشیان، وە ١٢ سەروازێ تەریچ بریندارێ بیێنێ، ئینەیچ ڕەنگە جارێوتەر ناکۆکی ئێران و ئەمریکای قوڵکەرۆوە.

لاو وێچشۆ نوسینگەو د. بەرهەم ساڵح سەرۆکو کۆمارو عێراقی جە بەیاننامێوەنە هێرشەکەش بە تیرۆریستیانە جە قەڵەمدا و وەڵاشکەردۆ، ئامانج جە هێرشەکەی تێکدای ئاسایشو وڵاتەکەین، دوایچش کەردە پەیجوری بەپەلە چا بارۆکریۆ و بکەرەکاش و ئاکەسێ ئینێ پەشتەو ئا هێرشاوە ئاشکرا کریا.

محەمەد حەلبوسیچ نوسینگەو سەرۆکو پەرلەمانو عێراقی داواش جە سەرۆک وەزیری وەختی کەردێنە، ڕاکارەکێ تنن کەرۆوە پەی پارێزنای هێزەکاو هاوپەیمانی نێودەوڵەتی دلێ خاکو عێراقینە.

حەلبوسی داوایچش جە سەرۆک وەزیرا کەردێنە ڕاکارەکاو سزادای و ئاشکراکەردەی بکەراو پەشتی ئا ڕووداوا دەسپەنەکەرۆ، ئانەیچش واتەن ئا جۆرە هێرشێ ئامانج چەنەشا تێکدای ئاشتیین سەرو خاکو عێراقیوە.

هاموەخت نوسینگەو عادل عەبدولمەهدی سەرۆک وەزیرو وەختی عێراقی جە بەیاننامێوەنە داواشکەردێنە، بەپەلە دەس بە پەیجوری جە ڕووداوەکەی کریۆ و کەسێ پەشتەو ئا هێرشەیە ئاشکرا کریۆو دریا دادگا ئەگەر هەر کەس و لایەنێ با، وە هێرشەکەش بە مەتەرسی پەی سەرو ئاسایشو عێراقی وەسف کەردەن.

دڵنیایی ئانەیچشدا کە بەزوترین وەخت سزاو ئا کەسا مڎەیمێ کە ئا هێرشەشا کەردەن، پەنەش پاسەن ئا کارێ ئاستەنگ وەردەمو بەرەو وەڵێ لوای عێراقی درووس کەرا.

ئینە جە وەختێنە کریا، شوەی ویەردێ شانەو ئەمنی عێراقی وەڵاشکەردۆ، کە ١٠ کاتیۆشێ ئاڕاستەو بنکەی سەروازی تاجی سەراوننو بەغا کریێنێ، دماتەر بنکەو وردای کاتیۆشاکاشا وێستۆ جە دەوروبەرو هێرشەکەینە کە سەر و ئۆتۆمبێلێوە بێ.

جەلایێوەتەرۆ، وەزارەتو بەرگری ئەمریکای "پێنتاگۆن" وەڵاشکەردۆ، گرد ورچنیێوە وەردەممانەکریاوەن پەی مامەڵەکەردەی چەنی هەڕەشەکاو ئێرانی دلێ عێراقینە.

11:57 - 12/3/2020 تازە کریانۆ

پەیلوایو تۆ؟
Loading...
پەیلوای

هیچ پەیلوایە نەنریانەرە.