ویروڕا

01:32 - 13/5/2020

وەلی فەتاحی

گۆرانیەی هەورامیە، پاپ،ڕەپ

گۆرانیەی هەورامیە، پاپ،ڕەپ


ئاخر و ئۆخروو ساڵەو شەسی بێ کە بڕێو ئازیزێ جە شارەو تەشریفشا ئاوردٚە بێ پەی یانەیما، بیێ بەمێمانێما و شەوێ لاماوە مەنێوە. زمسان بێ و هەوا تا ڕادێو سەردٚ و ئێمەیچ سۆبەی هەمەدٚان کارما نیابێرە. ئانەنە ئی سۆبێ کەم و زیادٚ کەرا، هەرچندٚە سەری وێرەگا گەرم و وەش بیەبێ، بەڵام چەوسەرقەترێ نەوتەکێش کەمێ باوە وسەردٚشا بۆ. توومەز مەکەرە، کە فرەش کەرا، گەرما و کە کەمش کەراوە یانەکە سەردٚ بۆوە. ساحبێ دمای نان و چای واردٚەی، یۆشا ماچۆ: نمەلوە هەتا سۆبێوی کاربراتۆریتا پەی نەسانوو، ئینە چێشا ئی هەمەدٚان کارە، چی دوێش نمەدٚەی چۆری، ئێشەو ڕەقێ بیێنمێوە. بەڵام هەم من و هەم ژەنەکێچ قبووڵما نەکەردٚ، نە وەروو ئانەیە کە گرانا و زەڕما نیا، وەروو ئانەیە کە ئێمە بە هەمەدٚانکاری فێرێ بیێبێنمێ و ئەجێما ئەگەر هەمەدٚان کار نەبۆ گڕما گنۆ وەنە! چوون مەرحووموو بابایم واتەبێ سۆبە یانێ هەمەدٚان کار کە دەعەلادینێ و دە سۆبێ هێزمینێ مێژۆ. دیارا بابایم ئا سۆبەشە چەنی سۆبەی هێزمینی بەراوردٚ کەردٚەبێ، نە چەنی سۆبەی کاربراتۆری. مەعلووما، ئەگەر بابام ئیسە مەنەبیایا، واچێ: پەکەیج و ڕادیاتورێتا پەی چێشی کە سۆبەی کاربراتۆری دە دانێ ئەچی پەکەیجا ئێژاییش هەن!
ڕەنگا عادٚەتێوی وەش نەبۆ کە تەنیا ڕای وەڵینە و تەجرەبە کریای و سووک و ئاسانە بەڕایێوە عالە و درۆسە بزانمێ. هەمیشە ڕەحەت تەرین ڕا، خاستەرین ڕا نیێنە. گردٚیما مزانمێ وەختارێو جەنابوو «نیما یوشیج»ی ئاما و شێعرەی تازێش ئاوردٚە غەیر جە وێش هیچ کەس ڕازی ئەپا وەزعێ نەبێ، تەنانەت کلاسیک واچەکێ بیێ بە مدەعیێش. بەڵام ئارۆ چێش؟ فارس واتەنی:«معما چون حل شود آسان گردد.»
جە ئا ساڵانە کە ئێسلاح تەڵەبەکێ ئێرانی کەوتێبێنێ سەر و خەری وێشا «محمد جواد حجتی کرمانی» بابەتێوش جە ڕۆنامێوەنە بە نامێ«از دوش حمام تا ماهواره»ی نویسە بێ، ئەپی مەحتەوایەو کە ئانە چی ئێمە هەر چێوێوی تازە مێ دلێ ژیوایما، گۆرج و گۆڵ دژایەتیش چەنی کەرمێ و هاوارێما هۆرزا و گنمێ دادٚ و بێدادٚ. تا چندٚ ساڵێ چەی وەڵتەر فرەو ئا ئازیزا کە وێشا بە مۆئمنی ڕاسەقینە زانێنێ، مۆخالفێ سەر سەختێ ماوارەی بێنێ و تەنانەت بڕێوشا ئا یانێ کە ماوارەشا چەنە بێ نەلێنێش وەنە! واچێنێ با گۆنابارێ نەبیمێ. بەڵام ئارۆ چێش؟ ئایا ئارۆهەر ئانێ وێشا دەیان کاناڵێ ماوارەییشا نیێنێ کە چەنەشا تەبلێغ کەرا؟
وەختارێو«میرزا حسن رشدیه»ی مەدٚرەسەش ئاوردٚ ئێران کێ بێ کە مۆخالیفەتش چەنی نەکەرۆ، بەدٚبەخت زاتش نەبێ بە ڕێک و پێکی وێش وزۆ سارا. ئارۆ چێش؟ لالۆ حەمە ماچۆ: وەختارێو مەدٚرەسەشا ئاوردٚ پەی شۆشمێ دەسەڵات دارەکێ وەختی، زاڕۆڵەکاشا نەکیانێنێ مەدٚرەسە و تەنیا هەژارەکێ کە دەسەڵاتشا نەبێ کیانێنێشا!! ئەی ئارۆ چێش؟ ئایا بە پێچەوانە نیا؟
هەر پاسە متاومێ ڕەوایەتێ فرێ و فراوانێ بارمێوە. با دالێو سەخت نە گێرمێ و مەولانا واتەنی:«هەرچە می خواهد دل تنگت بگوی» فرەو چێوا بێنێ کە تا هیزی قەباحەتشا بێ بەڵام ئارۆ شانازیشا پەوە کرێۆ!
ئەچی ڕوانە بنیادٚمێو ئامان و گۆرانیوەی هەورامیەش بە  شێوازوو پاپی واتێنە و خەریکا قۆرسایی کەرۆ سەروو شانەو هەورامی زوانەکاوە. چی؟ ڕەنگا فرەش وەروو ئانەیە نەبۆ کە چی ئی گۆرانیێشە هەٚر پێسەو چاوەڵی و عەینوو سیاوچەمانەی یا چەپڵا و وردٚە بەزما نەواتێنە. نا. من ئەجۆم تازەگەریەکش پێسەو پاپ واچێوی هەورامی یاگێ ڕێز و حۆرمەتیەنە و بەڕاسی مەرحەباش وەنە بۆ، تازەگەریش کەردٚەن. بەڵام ئەگەر جە هۆرچنیای شێعرەکاشەنە فرەتەر دێقەتش کەردٚایا، خاستەر بێ. ئەگەر دروێم نەدٚای بۆ  گلەیی و بناشتوو ئازیزا فرەتەر سەروو ئی بەشەیە بۆ. ڕەنگا ئازیزێ چانەیە مەتەرسیشا بۆ کە خوای نەخواسە نەوەک مسداقوو ئینە بۆ:« ئەگەر می خواهی کسی را خراب کنی از او بد دفاع کن.» من پێسەو تاکە کەسی مۆخالفوو ئی چێوەیا نیێنا و باوڕم ئانەنە:«نفی دیگران دلیلی بر اثبات ما نیست.» و تازەگەری بە هەرمانێوە خرابە نمەزانوو، چووون ئەگەر تازەگەری نەبۆ ئەی ئی گردٚ چێوە تازێ چەنی وەشێ بیێنێ؟
وەلی فەتاحی
23/2/1399

پەیلوایو تۆ؟
Loading...
پەیلوای

هیچ پەیلوایە نەنریانەرە.