هەورامان

11:28 - 28/6/2020

پەرسە و سەرەوەشی پەی خەڵکوو هەورامانی

⚫️سه‌دٚای ئاسیاوچی مه‌یۆ په‌یاپه‌ی ئاسیاو خاڵیه‌ن نۆبه‌ته‌ن سا ده‌ی⚫️ بە دڵێوی ماتەمینەوە هەواڵوو باڵ‌گێرتەی یەرێ شابازێ تێژباڵێ بوومەو هەورامانی، که به لێرەی بەرز، هەڵمەتێ شێرانێ و ورەی پۆڵایینەوه پەی پارێزناو دارستانەکاو «مه‌نته‌قه‌و بووزین و مه‌ره‌خێڵ»ی، شەپۆلوار پووزەوانێشا هۆر کەردٚێ بێنێ و پێسەو تۆفوو سەرکەلا، گڕەکێ وەرێنێره و ژیوگاو نیشتمانی سەوز ئازێنێوه، گردٚێما تووشوو ماتەمی و پەژارەیش کەردێنمێ. کاکه موختار خەندانی کاکه بێلال ئەمینی کاکه یاسین کەریمی هەڵای لاونای «شەریف و ئومید»یەنه نەسیای بێنمێوه، قڕچەو دڵیما و زامێ ڕۆحیما تازێ بیێوە. هەرسی نمەمجووره پەی شەهێدٚ بیەیتا، چوون خاس مزانوو نمەمرا ئانێ دڵوو مێللەتیەنە مژیوا، بەڵکوو هەرسی پەی چۆڵی سرۆشتوو زاگرۆسی و نەبیەی دڵسۆزوو کۆ و کۆساری مجووره. ئەرێ، بێ شمە ژیوای چەنی مدٚا سەر؟ بێ شمه ژیوای چەنی نەمدرا؟ بێ شمه ژیوای، چەنی نەمدرا؟ به دڵێوی تاسەبار و به چەمێ هەرسینێوه، لاو ئەنجومەنوو فەرهەنگی ئەدەبی ڕۆجیاری و ئه‌ره‌مه‌رزیای فه‌رهه‌نگی هونه‌ری شنه‌و فه‌رهه‌نگوو هه‌ورامانی په‌رسه‌ و سه‌ره‌ وه‌شی وێما ئاراسته‌و خانه‌واده‌و ئا ئازیزه کۆچ کەردٚا‌ و کۆمه‌ڵگای مه‌ده‌نی و فه‌رهه‌نگی هه‌ورامانی به تایبەت و کوردٚەواری به عام که‌رمێ و وێما به‌ ساحیب په‌رسه‌ مزانمێ. یادٚتا سەوز و ڕاتا پەڕ ڕاویار ئەنجومەنوو فەرهەنگی ئەدەبی ڕۆجیاری ئه‌ره‌مه‌رزیای فه‌رهه‌نگی هونه‌ری شنه‌و(نه‌سیم) فه‌رهه‌نگوو هه‌ورامانی

پەیلوایو تۆ؟
Loading...
پەیلوای

هیچ پەیلوایە نەنریانەرە.