فەرهەنگ و هونەر

01:10 - 12/8/2020

زاراوەکاو سیخورمەی

زاراوەکاو سیخورمەی زاراوەی (۱) ا➖➖➖➖ا گۆترەنویس_Gotreniwîs ــــــــــــــــــــــــــــــــــــــــــــــــ ✍ سێخورمە

 

🔸دنیاو نویسەینە چند جۆرێ نویسەرێما هەنێ، پێسە داستانویس، تەنزنویس، ڕۆماننویس، وتارنویس، شانۆنویس، ڕۆنامەنویس و... بەڵام چن ساڵێوا چی وڵاتەو ئێمەنە گیانەوەرێو تەر کەوتەن بەرەوە، کریۆ چندین نامێ جۆراوجۆرێش پەی تاشی و گردیچ لایەقو باڵاش بان. سەرو ئێزنوو گردلایەتان ئی جۆرە بنویسەمە نامێ نیان گۆترەنویس_Gotreniwîs. بە یاوەری تۆڕە کۆمەڵایەتییەکا گۆترەنویس و گۆترەنویسی -نەسر و شێعر- خەریکا ڕۆبەڕۆ پەرە مسانۆ، جاران گۆترەنویسی، پێسە مۆدی یەخێ نویسەرە جدیەکایچ گێرۆوە و گنانە دامەو گۆترەنویسەی. 
🔸گۆترەنویس، بە نام نویسەرێوا، بابەتی ئەڵەکی و دەردنەوەر و موچیاریکەرانە، بە هەناسێوی گردیواچانەی بێ ئازار، چی سایت و چەو کاناڵ، بێ پرەنسیب و وەرچەمگرتێو، گۆترەنویسەکاش وەڵا کەرۆوە. گۆترەنویسەر، سەر و بنو قساش دیار نیا، وەردەنگش گما، ڕۆشن نیا چێش ڕەد کەرۆوە و چێشش قەبووڵا. وێش پەی وێش، مارکەو دڵسۆزیش کێوەنە سینەشەرە و بانگەشەو بێ لایەنی کەرۆ؛ بەڵام بێ لایەنیەکەش تا زەنگۆڵێ چەقان لیتەو  بێ خاسیەتیەرە و هەڕەمە و فەست‌فوودی ڕووبەڕوو چێوەکا بۆوە و ماتەمات فەرمایشتێ فەرماوۆ. جاران کۆڕەکانە چن دەماخێ هۆرپێکۆ، وەختێ گنۆنە تەنگنا بۆ بە کەسێوی دنیاوەتەن، هەرکات لازمیچ کەرۆ، بۆ بە لایەنگرو لالۆ فەتەو دەگاکێ وێشا. گوترەنویس بە هۆ نەبیەو گوفتمانی، بابەتەکا و دیاردەکا ئەڵەکی سادە و بێ مانا کەرۆوە و پرسە جدیەکا موزیانە کەرۆ چێرو لچاوە. پەرێشانی پەیلواکاشەوە دیارەن. کاکی گۆترەنویس جگە نویسەی، بە کەسایەتێوی ئاخنیا بە پۆپۆلیسم، عەوامگەرانە و بێ پرەنسیبانە گلێرەوبیەکانە بە "گۆترەواچی" بەشدارەن. ئۆپۆرتونیستیوی دوانزە عەیار. پرەنسیبەکێ ئازارەش مدانێ، ڕادەبەدەر حەزش بە بەرکەوتەی هەن، هۆرگیروو کەسایەتیوی شانۆیین، بە لووسبازی ڕاستیییەکا شارۆوە.

🔸چند تایبەتمەندیێ گۆترەنویسی و گۆترەنویسەکان:
🔘نویسەو گۆترەنویسەکان تەشکش نیا، مالووم نیا چکۆوە دەس پەنەکەرۆ و چکۆوە کۆتاییش مەی. گۆترەی قسێ و کەلیمێ خزنانە نویسەکەی و فرەوجارا چێوەکێ چەنی گردینەو بابەتەکەی یۆنمەگێراوە. پەوچی گۆترەنویس، پێچەوانەو نیشاندای وێش، ترنجیانەنە ئاساوەکەو لاو یانەو وێشان. 
🔘 کەلیمێ و دێڕبەندی گۆترەنویسەکا بە تەرزێو چنیانێ، دنیای ڕۆشنویریەنە هۆرگیروو هیچ خاسیەتێوی نیەنێ و ڕۆشن نیا چێش ڕەد کەراوە و ورکەو چێشیشانە و چێش ئازارەشان مدۆ. پەی پارێزنای بەرژەوەندییە کەسەکیی و کەسایەتییە فەشەلە کێخاگەریەکەیشان، هەرگیز تەوانوو ڕۆشن نویسەی و ڕۆشن واتەیشان نیەن. 
🔘گۆترەنویس، هیچ بابەتێوەنە زانیاری قووڵ و فرەلایەنش نیا، ڕواڵەتی و عەوامانە و دەشتەکی، وێش مدۆ قەرەو باسەکاوە. زانیاریوی سادە و کاڵوخامش جە ئەدەبیاتی و دنیاو نویسەی و نویسیاریی هەن. جە واتەو بەجاران قسە سادە و تکراریان تەرێق مەبۆوە.
🔘 گۆترەنویس، تەقەلا کەرۆ شناس و تاریفو وێش شارۆوە، هەڵبەتە ئەگەر بۆش! تا هەم هەزینە نەکەرۆ، هەمیچ بە قازانجو وێش لایەنەکا دۆشۆنە و هەرکاتیچ لازم بی وێش سەربەوێ نیشانە دۆنە و تەپڵو گۆترەنویسەی ژەنۆ.
🔘گۆترەنویسێ هەمیشە کەمینەشا کەردێنە تا یۆ وەروبەرەو یانەیشانە پاش خزۆ! یا نازە ناخونش ئاودز کەرۆ! ئێتر گوڕای‌گوڕ گۆترەنویسەکێ، گۆترەنویسەکاشا (شێعر و نەسر) کوانێ تەوێڵەو سایت و کاناڵەکارە.
🔘گۆترەنویس تەمامو تەلاشیش کەرۆ سیاسەت و داخوازی سیاسی، دیمەنو قسەکاشەو سڕۆوە و (سیاست‌ زدایی)شا کەرۆ؛ کەچی فرەوجارا وێش (سیاسیکارانە) جوڵیۆوە.

تا زاراوێو‌ تەر...

ـــــــــــــــــــــــــــــــــــــــــ
☑️سرنج ۱: جارێ زاراوەو (گۆترەنویس)ی جە سێخورمەی هۆرگێردێ، تا دماتەر نویسەو گۆترەنویسەکا بەوردی و مسداقی و نزیکەو شی کەرمێوە.
☑️سرنج ۲: مەبەست جە گۆترەنویسی، ئا وەشەویسێ نیەنێ تازە زوان فێرێبیێنێ و گروەکانە کامنت منویسا، ئی ئازیزێ فرە یاگێ ڕێز و حورمەتیەنێ. 
☑️سرنج ۳: ڕانویسوو ئی بابەتەیە نە سەداسەد، بەڵام فرە نزیکا بە ڕانویسوو "کۆڕی زانیاری".

پەیلوایو تۆ؟
Loading...
پەیلوای

هیچ پەیلوایە نەنریانەرە.