جیهان

10:55 - 29/11/2020

گردو سکاڵێکێ ترەمپی شکستشا ئارد

دادگاو باڵاو ویلایەتو پەنسلڤانیای رۆ شەممەی سکاڵایێوە تازێش ڕەد کەردۆ، کە جەلایەنو تیمو کامپەینو ورچنیەو دۆناڵد ترەمپیوە پێشکەش کریێبێ جەبارەو ئەنجامدای سەرپێچی جە هورچنیەکاو سەرۆکایەتی ئەمەریکاینە، پینەیچ دادگاکە گرد ئەگەرێوەش پەی واڕای ئەنجامو ورچنیەی چا ویلایەتەنە، شکست پەنەئارد.

بەپاو سکاڵێکێشا، کۆمارییەکێ داوا کەرێنێ ئەنجامو دەنگدای جەڕاو پۆستیوە رەتکریۆوە، یان ئەنجامو گردو دەنگداکەی جە ویلایەتو پەنسلڤانیای رەتکریۆوە و یاساشناسەکێ ویلایەتەکەی وێشا بەبریوە و ورچنیەی دیاری کەرا. ئینەیچ وەختێنە ئاما جۆو بایدن، کاندیدو دیموکراتەکا بە جیاوازیی 81 هەزار دەنگا، چا ویلایەتەنە وروەست سەرو دۆناڵد ترەمپیرە.

دادگاکە، هەردووی داواکاریەکێش رەتکەردێوە، بەڵام بە داواکارییەکەو دووەمی سەرەشا سڕمەن ماچۆ "ئامانج چا داواکارییەیە ئانەن؛ "دەنگو 6.9 ملوێن کەسا جە ویلایەتو پەنسلڤانیاینە، بێدەنگ کریۆ".

سکاڵێکێ کۆمارییەکا تانێشا جە یاسایێوە دێنە، کە جە ساڵەو 2019 دەنگش سەردریان، پەیوەندییش بە دەنگدایۆ هەنە جە ڕاو پۆستیوە چا ویلایەتەنە.کۆمارییەکێ جە سکاڵێکێشانە ماچا "ئا یاسێ، نادەستوورییەنە".

دادوەرەکێچ جە حوکمەکەشانە ماچا، ئیسە دێرا پەی تانەدای چا یاسێ، جەوەختێنە ساڵێوە ویەردەن سەرشەرە ".

جە 24-11-2020 ویلایەتو پەنسلڤانیای سەرکۆتەی جۆو بایدنیش بە فەرمی وەڵاکەردۆ، بەڵام ئا سکاڵا تازێ کۆمارییەکا تانەدای بێ چا بڕیارەیە.

دۆناڵد ترەمپ، سەرۆکو ئەمەریکای پەنج شەممەی ویەردە جە توویتەرنە نوویستەبێش "ئا ورچنیایە بەڕێژەو 100٪ ساختە بیەن"، وە باسو پیلانگێڕیش کەردێنە جەبارەو بەردەیۆ بایدنیوە، وە گردو سکاڵاکاش جە فرەو ویلاتەکانە شکستشا ئارد.

جە وەرانوەرنە بایدن ماچۆ، "ئەمەریکییەکێ ڕا مەڎا، رێز جە ئەنجامو هورچنیەکاو سەرۆکایەتیی ئەمەریکای نەگیریۆ"، کە 3ێ ئی مانگێ ئەنجامدریا.

پەیلوایو تۆ؟
Loading...
پەیلوای

هیچ پەیلوایە نەنریانەرە.