ژه‌نی

12:58 - 13/1/2021

کناچێوەنا

کناچێوەنا


سەراسەر باوشی
سرشتوو مننە
 مشتە مەوینی
غەیروو وەختانەی
کێشوو بەرەترە؛
"درگەکەتم لێ بکەوە"...٭
چەنی وقرەی
بەیعەت مەکەروو
هەر پاسە دروێ
چەنی کۆڵەیی ئاسمانی
قەفەس چەنی ئازادٚی
یا تۆ چەنی ئامای...
لێڵ و بووڵوو عوسیانینە
 تەلاوەت کەرووە وێم
تا ڕوەی حەقیقەت
گۆلوو یاخیتەرین ئاخیمۆ بزیۆ.
کناچێوەنا کە شیەیم
ڕۆ پێدٚا بیەیم
ئەسپەردێشا کەردێنێ
کە ئەزەڵۆ خەم
نماو مەردەیش وەنا
جەنازەو قوولتەرین سەیێمرە
کە ئێبلیسوو وجوودٚیم
بە خودٚاو ژیوای "نا"ش وات و
-پەی ئەبەدی-
بەرە کریانێ...
دەروونم ئزگڵێوە
ئەوپەڕوو ئاوارین
وەهموو کاخێ بە
قامەتوو سامووتیمنە
خوڕەو قڵوازی و
سیا سفیدی دیدەیمنە
خەباتوو
 پلوورە وارانێ بە
کە دەسێ سەوزێت
مەبعووسێنێ
بە تەسکینەو مەڵهەمی
منیچ حەوت بلۆقێ هووناویێ
زیێنێ ڕۆحمۆ.
من
وەرموو ئا پەلکامە
کێشتێ بێنێم شەرابهۆر
 تەعبیر کەردەن؛
وەرکەوت
جە ڕەگەزوو شاناو تۆن و
 میراسوو تلۆعیش
چادٚیشا گێرتەن،
باڵاو ئەندیشەی
ئێننەو قامەتوو هەنگامە پیانەکاتا
ئانەی ڕوەو سەرابوو جێژوانێ ملی،
وەشەسیاییت
سەفەرنامەو ئاوێن
سەرمەنزڵش
نەجابەتوو پلمەو زریاین...
من ئەگەر شێعرێ نەواچوو
گەڵا هەر سەوز و
جوه هەر ڕەوان
بەڵام ئێتر ئا دیوارێ
پاشانە کۆمیلەم واردەنۆ
نامەکێت مەکەرا
وردوو زوانوو ئاجۆرەکاشا...٭٭
ڤلەگوڵاویت
وەڵوو واشانوو زڵفەکاشنە
فیلتر کریۆ
ئێتر مەژناسیم
کە دڵوو کۆینە ڕازێوەنە
 مچکلەتەرین درکش، دەرکەش کەرۆ...
#ژوان/پاییزوو۲۷۲۰
٭عەودڵڵا پەشێو
٭٭نامت چون ئەوراد سوبح و ئێواران
موانووش وە گەرم نە پای دیواران
مەولەوی

پەیلوایو تۆ؟
Loading...
پەیلوای

هیچ پەیلوایە نەنریانەرە.