جیهان

12:06 - 30/1/2021

ڕسمو سەرو ۲۰ دۆلاری ئەمریکی واڕیۆ

ڕسمو سەرو ۲۰ دۆلاری ئەمریکی واڕیۆ

هەورامان نیوز 
ئیداره‌و جۆو بایدنی، سه‌رۆكی تازەو ئه‌مه‌ریكای واتەنش، هەوڵەکێ پەی خێراکەردەی و نیایرەو وێنه‌و هاریێت تابمانی، چالاكوانو وه‌رهه‌ڵستكارو كۆیلایه‌تی سه‌روقاقەزی نه‌ختینه‌یی 20 دۆلاریوە چڕ كەردەنۆ.

وەڵێتەر بڕیاربێ قاقه‌زو نه‌ختینه‌یی تازەو ئه‌مه‌ریكای جه‌ ساڵەی ویەردێنە به‌ وێنه‌و ئا چالاكوانه‌یۆ بەرگنۆ، كه‌ هه‌ر جە وەخت و جە ئەدابیەیشۆجه‌ ساڵەو 1820 ده‌سو كۆیلایه‌تیوە ناڵنێ. وه‌زاره‌تو گه‌نجینه‌و ئه‌مه‌ریكای پلانەو نیایرەو وێنه‌و ئا چالاكوانه‌یە جه‌ شۆنەو وێنه‌و ئه‌ندرۆ جاكسۆنی، سه‌رۆكو وەڵینتەرو ئه‌مه‌ریكای، كه‌ ژمارێوە كۆیلێش بێنێ، متەنەرە.

بڕیارو بەرشیەی نه‌ختینه‌ تازەکەی جە سه‌رده‌مو ئیداره‌و دۆناڵد تره‌مپینە، سه‌رۆكی وەڵین و ئا وڵاتینە مردا. دماو لوای بایدنی پەی كۆشكەی چەرمێ و ورگێرتەی ده‌سه‌ڵاتی پێسە سه‌رۆكو ئه‌مه‌ریكای، ئا پلانێ زیننێ کریاوە و كۆشكەی چەرمێ وەڵاشکەردۆ، ئیسە وه‌زاره‌تو گه‌نجینه‌ی شێوازو هه‌نگامەکاش و خێراكەردەی ئا پرۆسه‌یه‌ ورسەنگنۆ.

هاریێت تابمان، چالاكوانێوە ئه‌مه‌ریكیی به‌ڕه‌گه‌ز ئه‌فریقی بێ، جه‌ ساڵەو 1820ی جە ویلایه‌تو مێریلاندی جه‌ ئەدێبیەن و جه‌ ساڵەو 1913 مەردەن، به‌بێ ئانەی زانۆ كه‌ دماو زیاتەر جه‌ 100 ساڵا دماو مەردەیش، وێنه‌كه‌ش جۆرێوە قاقەزو نه‌ختینه‌یی ئه‌مه‌ریكای ڕازنۆوە.

تابمان به‌ كۆیله‌یی جه‌ ئەدێ بی، به‌ڵام تاوانش كه‌سایه‌تیێوە مێژوویی پەی وێش درووس کەرۆ، به‌ چالاكییه‌كاش جە بوارو ناستەی كۆیلایه‌تی و چێردەسی و هەرمانە نهێنییه‌كاش جه‌ به‌رژه‌وه‌ندی یه‌كێتی جه‌ سه‌رده‌مو جه‌نگ و براکوشتەی ئه‌مه‌ریكاینە ئشناسیان.

دماو ئانەی خاوه‌نه‌كه‌ش ئه‌شكه‌نجه‌ش مدۆ، تاوانش جه‌ ویلایه‌تو مێریلاندینە به‌ره‌و فیلادێلفیای ڕەمۆ، به‌ڵام دماو ماوێوە جە پێناوو ئازادكەردەی ئه‌نداماو خانه‌واده‌كه‌یشنە و ده‌یان كۆیلا تەرینە، گێڵانۆ پەی مێریلاندی، دماتەر تاواش سه‌ركردایه‌تی 13 پرۆسا هامشێوه‌ی کەرۆو و 70 كه‌سێ به‌ڕه‌گه‌ز ئه‌فریقیێ جه‌ كۆیلایه‌تی و چێرده‌سی رزگارکەرۆ.

دماو دمایی ئامای جه‌نگو براکوشی، چالاكییه‌كاش جه‌پێناوو مافو ده‌نگدای به‌ ژەنا زیاتەر کەرۆ. جه‌ساڵەو 1913 به‌هۆکارو تووشبیەیش به‌ هه‌وكەردەی شۆشێشۆ عەمرەو خوای کەرۆ.

پەیلوایو تۆ؟
Loading...
پەیلوای

هیچ پەیلوایە نەنریانەرە.