ویروڕا

01:38 - 22/2/2021

سیاوەش محەممەدی

یاپراخەکێ لالۆ سەعەی و خەفەتو مەتی وەنۆشێ!

یاپراخەکێ لالۆ سەعەی و خەفەتو مەتی وەنۆشێ!


بۆنەو ڕۆ زوانی ئەذایی و خەفەتا وێم و ئەذیم.
ماچۆ ئەذام خەفەتێ گۆترەیێ فرێ وەرێنە و نەزانێ خەفەتی گۆرە چێشا!
هتر ساڵە ئاما و کافێ واڵیم شووش کەرد و لوارە کرماشان، ئۆسایچ کرماشان پسە بێ خارجی. خۆ نە ماشین بێ و نە جاذە، بە ساڵ یۆ یەکتری نەڤینێ. هتر چەنی شێڕەو مەڵا ژەنێ هەتا بانگو مەغریبی ئەذام پا سەرو پاسارەیۆ شیوەن و کەلە باوکەڕۆش بێ پەی کافێ. ئا ساڵە وەزعەو ئێمەیچ هیچ خاسە نەبێ، ئێمە بێنمێ و هەرە شەلێو و یەرێ بزێ.
ساعبانێو ئەذێم چریش ئا سەعە ڕۆڵە لوە کۆچێو گەڵا بارە با یاپراخی پێچنوو. منیچ وەشیییەنە چێڕیم ڕەمێ بێنێوە و پەلە پەل واتم تا پەشیمانە نەبیێنە و ڤیرێ کافێش نەکەردێنێوە با بلوو گەڵاکەی کەنو، دەی گەڵام ئاردەو هەیوانەکێنە ئەذێم پێچنێش و نیێبێنێش سەر تا گریا. ناکاوێوەنە چریش ماچۆ سەعە ڕۆڵە، ئەرێ ئانە بزەکێ دوێنێ و یوەشا دیارش نیا، لوە پەرسە لالۆ قالەی بزانە ئاذی نەذیێنە. لالۆ قالە وێش شوان بێ و ئاگاش جە گرچێوی بێ. بەڕەمای وێم یاونارە لا لالۆ قالەی و هەواڵو بزێم چەنە پەرسا. تازە جگەرەش پێکنابێوە و نیابێش دەمجگەرەکەیشۆری، من یاوانێ پەنە، ئشقارتێوەش نیاپۆ و منش دیا نەفەسێوە قووڵەش دا جگەرەیۆری، واتم لالۆ قالە ئەرێ حەیوانەکەما ئامانۆ و بزێوەما نیەنە، هتر دەمو جگەرەکێشتەکەیشۆ هەناسێوی سەردش هۆر کێشت و ماچۆ بەخوا ڕۆڵە پەچەگا تاشێ تلێ بیێ و نگبەتی شمە بزێوەتا پێکیا و هەر چا نەیاوا کاردێرە و مردارە بیۆ. سەرە تەکنای گێلانێ پەی یانەی و واتم با نەواچوو ئەذیم بزێما مردارە بیێنۆ تا ئی یاپراخا بوەرمێ، خۆ ئاذە بێ نای نای، نای مژەنۆ، خەفەتو کاڵێ کەم بێ ئینەیچشە ئامابۆ سەر، هەی هەی!
واچێ سەرەیتا نەئێشنوو، ئامانێ یانەو کردم بەرۆری، ئەذیم وات ڕۆڵە پەرسات قالەی، بزانی بزێش نەذیێنە! منیج واتم ئا ئا ئەذا، ماچۆ ئینا گەلو گەلەیۆ و ورەگا کیانووشۆ. ئەذێم سفرەش یاوابێرە و قاولەمۆ یاپراخاش وستەبێ لا، کتریە سیاوێچ سەرو ژێڵەکێوە قۆڵێ دێ پەی چای. ماچۆ ئەذام؛ تا حەمەکەرەمیچ مێوە یاپراخێچ سەردێ باوە ڕۆڵە. دوورۆ دیانێ دیم حەمەکەرەم کڵاومشکیش کریانۆ و ئینا باوشیشەنە و بیبنە تەکیۆ شۆنیشەرە و بە ڕەمای مامیوە! واتم ئەذا یاپراخەکا کەرەرە ئانا حەمەکەرەمیچ ئاماوە. هتر دڵم تەپەش ئێ یاخوا، مۆڵۆذو پێغەمەری حەمەکەرەم نەواچۆ ئەذیم بزێ مردارە بیێنۆ تا ئی یاپراخا بوەرمێ.
یاپراخێ کریێرە و نەکریێرە، حەمەکەرەمی بە باوکەڕۆ کەرذش بەرەیۆری؛ ماچۆ ئەذا باوکەڕۆ! هەڕە کریا سەرەمارە، هەرە شەل کاوەویارا تل بیەو تۆپا! منیچ هتر زانام تازە مشیۆ تەمەو یاپراخایچ بڕو، واتم وەڵا ئەذا گیان بزەکێچ نیەنە لا گەلەیۆ، پەچەگا تاشی پێکێنە و مردارە بیێنۆ

01:40 - 22/2/2021 تازە کریانۆ

پەیلوایو تۆ؟
Loading...
پەیلوای

هیچ پەیلوایە نەنریانەرە.