هەورامان نیوز
دۆناڵد تره‌مپ ده‌ستی به دانانی وه‌زیر و به‌رپرسه‌كانی كردووه و ئاماده‌كاری ده‌كات تا 20ی كانوونی دووه‌می ساڵی داهاتوو، سه‌رجه‌میان ده‌ستنیشان بكات، میدیاكان باس له‌وه ده‌كه‌ن تره‌مپ كه‌سێكی دژه ئێرانی و چینی بۆ وه‌زیری ده‌ره‌وه‌ی حكوومه‌ته‌كه‌ی ده‌ستنیشان كردووه.
ئه‌و كه‌سه‌ی پاڵێوراوه بۆ ئه‌و پۆسته گرنگه، ماركۆ رۆبیۆیه و هه‌ندێك میدیا باس له‌وه ده‌كرێ خۆی بۆ ئه‌و پۆسته ره‌زامه‌ندیی ده‌ربڕیوه.
یه‌كه‌م جار نیویۆرك تایمز و پاشان ئێن بی سی نیوز باسیان له‌و زانیارییه كرد، هه‌رچه‌نده هێشتا به فه‌رمی هیچ شتێك له ئارادا نییه و نه تره‌مپ و نه نووسینگه‌ی ماركۆ هیچ هه‌ڵوێستێكیان نه‌بووه.
مارك رۆبیۆ له ساڵی 2010ه‌وه ئه‌ندامی ئه‌نجوومه‌نی پیرانه و به گوته‌ی نیویۆرك تایمز، هه‌ڵوێسته‌كانی به‌رانبه‌ر به ئێران و چین زۆر توندن.
ئه‌و له دژبه‌ره سه‌ره‌كییه‌كانی رێككه‌وتنی ناوكیی نێوان ئێران و وڵاتانی پێنج كۆ یه‌ك بوو و چه‌ند جارێك ئاماژه‌ی به‌وه كردووه، بۆ ئه‌وه‌ی ئێران ده‌ستی به چه‌كی مه‌ترسیدار نه‌گات، پێویسته بكرێته ئامانجی هێرشی سه‌ربازی.
ئه‌و له لایه‌نگرانی سه‌رسه‌ختی دۆناڵد تره‌مپ له هه‌ڵبژاردن بوو و سه‌ره‌تا چاوه‌ڕوان ده‌كرا بكرێته جێگری تره‌مپ، به‌ڵام دواتر جی دی ڤه‌نس كرایه جێگر.
ئه‌ندامانی كابینه‌ی تره‌مپ له ماوه‌ی رۆژ و هه‌فته‌كانی داهاتوودا یه‌ك له دوای یه‌ك ئاشكرا ده‌كرێن، تا ئێسته لانی كه‌م سێ كه‌سیان ئاشكرا بوون.
س: wishe.net
