واشنتن داوای جێبەجێكردنی رێككەوتنی شنگال دەكات

لە 10مین ساڵوەگەڕیی كۆمەڵكوژیی كوردانی ئێزدی، كە لە 2014 بە دەستی رێكخراوی تیرۆریستی داعش دووچاری هاتنەوە، تا ئێستە برینی ئەوان كراوەیە و حكوومەتی فیدراڵی و چەند گرووپێكی چەكدار لە ناوچەكە رێگری لە ئاساییبوونەوەی ناوچەكانیان دەكەن، وەزارەتی دەرەوەی ئەمەریكا داوا لە بەغدا و هەولێر دەكات كار بۆ جێبەجێكردنی رێككەوتنی شنگال بكەن.

لە 2020 هەردوو حكوومەتی هەرێمی كوردستان و عێراق رێككەوتنی ئاساییكردنەوەی شنگالیان واژوو كرد، كە چەند بڕگەیەكی لەخۆ گرتووە و بە ئاساییكردنەوەی دۆخی شارۆكەكە و دەوروبەری و ئاوەدانكردنەوەی ناوچەكە و گەڕانەوەی ئاوارەكان و قەرەبووكردنەوەیان كۆتای دێت، جیا لە دیاریكردنی ئیدارەیەكی نوێ بۆ شارەكە و ئەركی پاراستنیشی دەدرایە هێزێكی پۆلیسی ناوخۆیی.

ماسیۆ میلەر، گوتەبێژ بەناوی وەزارەتی دەرەوەی ئەمەریكا لە بەیاننامەیەكدا دەڵێت، ئەمڕۆ یادی قوربانیانی كارەساتەكە دەكەینەوە و رێز لە هێزی رزگاربووانی كۆمەڵكوژییەكە و تاوانەكان لە دژی مرۆڤایەتی و پاكتاوی رەگەزی لە دژی ئێزدی و مەسیحی و موسڵمانانی شیعە دەگرین، یادی قوربانیانی موسڵمانانی سوننە و كورد و كەمینەكانیتریش دەكەینەوە، كە بوونە قوربانیی تاوانەكانی داعش. 

میلەر روونی كردەوە، داعش هەزاران ئێزدی كوشت و بە كەنیزەكی كردن، تا ئێستەش زیاتر لە 2.600 ژن و كچی ئێزدی چارەنووسیان نادیارە و ناسینەوە و دەرهێنانی ئێسكوپرووسكی قوربانیان لە گۆڕە بەكۆمەڵەكان بەردەوامە، رزگاربووانیش تا ئەمڕۆ شوێنەواری ئازاردانیان هەڵگرتووە، ئاماژەی كرد كە پاڵپشتیی ئەمەریكا بۆ ئەو كۆمەڵگەیانەی بەو كارەساتە ناڵاندوویانە جێگیرە و ئەركی هەمووانە رێز لەوانە بگرن كە دیار نەماون یان رزگار بوونە، ئەوەش لە رێگەی كاركردن بۆ بنیاتنانەوەی ئەو كۆمەڵگەیانە.

گوتەبێژی وەزارەتی دەرەوەی ئەمەریكا دووپاتی كردەوە، داوای جێبەجێكردنی یاسای رزگاربووانی ئێزدی و رێوشوێنە تەناهی و ئیداری و ئاوەدانكردنەوەی ناوچەكە دەكەین وەك لە رێككەوتنی 2020ی شنگالدا هاتووە، ئەوەش بە راوێژ لەگەڵ ئەو كۆمەڵگەیانەی كە شنگال بە شوێنی خۆیان دەزانن.