هەورامان نیوز
شوێنەوارناسان ئەو باوەڕە باوە پووچەڵ دەکەنەوە کە دەڵێت: باوباپیرانی دێرینمان تەنها “گۆشتخۆر” بوون. توێژینەوە نوێیەکان دەریدەخەن مرۆڤ هەزاران ساڵ پێش شۆڕشی کشتوکاڵی، دەستکاری ڕووەکی کردووە تاوەکو بۆ خواردن بشێت.
چیرۆکی سەرەکی: توێژینەوەیەکی نوێ ئەو باوەڕە باوە هەڵدەوەشێنێتەوە، کە مێژووی گۆڕینی ڕووەک بۆ خواردن بە 10 هەزار ساڵ دەخەمڵێنێت و ئەم مێژووە بۆ 23 هەزار ساڵ لەمەوبەر دەگەڕێنێتەوە.
بڵاوکراوەی فەرمی: بەپێی توێژینەوەیەک کە لە گۆڤاری (Journal of Archaeological Research)بڵاو کراوەتەوە، لە ناوچەی شوێنەواریی (Ohalo II) لە کەناری دەریاچەی تەبەریەی باکووری ئیسرائیل، زانایان 150 هەزار بەبەردبووی ڕووەکییان دۆزیوەتەوە.
ژمارەکان وا دەڵێن: دەرکەوتووە مرۆڤ 23 هەزار ساڵ لەمەوبەر دانەوێڵەی خۆڕسکی هاڕیووە، ڕەگە ڕووەکە نیشاستەییەکانی کوتاوە و کوڵاندووە، تەنانەت ژەهری چەرەسە تاڵەکانی لابردووە تاوەکو بۆ خواردن بشێن.
لە لایەکی دیکەوە: د. ئانا فلۆرین و مۆنیکا ڕامزی، نووسەرانی توێژینەوەکە جەخت لەوە دەکەنەوە: توانای “کوڵاندن و ئامادەکردنی ڕووەک” بۆ خواردن، هۆکاری سەرەکی بووە بۆ ئەوەی مرۆڤ، بتوانێت بە سەرتاسەری جیهاندا بڵاو ببێتەوە. – مرۆڤەکان تەنها ڕاوچی نەبوون، بەڵکوو شێف (خوانساز)ی لێهاتوو بوون و توانیویانە ژەمێکی بە تاموچێژ لە ڕووەک ئامادە بکەن.
س: www.ava.news
23 هەزار ساڵە مرۆڤ خواردن لە ڕووەک دروست دەکات
